Një tjetër person është arrestuar këtë mëngjes në Maltë, për vrasjen e dyfishtë në Sliema.
Policia maltese ka prangosur Viktor Dragomanskin, që akuzohet për vrasjen e Christian Pandolfinos dhe Ivor Maciejovskit. Inspektorët thanë se Dragomanski është i dyshuari i dytë për vrasjen e bujshme të ciftit homoseksual, raporton Malta Today.
Dragomanski akuzohet për vrasje të dyfishtë më datë 18 gusht 2020, vjedhje, zhvatje, posedim të një arme zjarri gjatë kryerjes së veprave penale, trajtim i mallrave të vjedhura, vjedhjen e një makine dhe ndërrimin e targave të mjetit, edhe këto kanë rezultuar si të grabitura.
Dragomanski është paraqitur në gjykatë, me shenja të kuqe në ballë. Ai foli për disa nga pyetjet fillestare që shtroi gjykata.
I pyetur se cili ishte profesioni i tij, ai u përgjigj “Unë nuk punoj”. Maqedonasi u shpreh se është i pafajshëm. Viktor Dragomanski është i dyti person që akuzohet për vrasjen e dyfishtë të një cifti homoseksual në Maltë. Më herët, policia ka arrestuar Daniel Mukën 25 vjec, që është mbajtur në paraburgim.
Nga policia thanë se Dragomanski u arrestua, pasi gjatë pamjeve filmike, ka rezultuar se shtetasi i Maqedonisë Veriore është personi që ka marrë pjesë në këtë vrasje. Gjykata ka thënë se arrestimi ishte i ligjshëm dhe vendosi sekuestrimin e pasurisë së Dragomanskit. Maqedonasi u la në paraburgim.
