Dy bashkëpunëtorët e Emiljano Shullazit janë vënë në pranga sot për vendosjen e një gjobe prej 1 milionë eurosh ndaj një biznesmeni.
Burime nga prokuroria thanë për SYRI.net se biznesmeni që i është vënë gjoba ka derdhur disa çeqe.
Të njëjtat burime kanë treguar se personit që i është vendosur gjoba prej 1 milionë eurosh besohet se është Ylvi Beqaj, biznesmeni i cili pak muaj më parë deklaroi se ishte ai që i kishte dhënë Shullazit një pjesë të ish-hotel Vollgës në Durrës. (ne foto Endrit Qyqja i arrestuar sot bashkë me Endrit Zelën)
Burimet e prokurorisë thanë se, pasi ka marrë 20 përqindëshit e ish-hotel Vollgës, i kishte vendosur edhe një gjobë prej 1 milionë eurosh biznesmenit Beqaj, i cili sipas të njëjtave burime ka bërë edhe derdhjen e çeqeve në emër të bashkëpunëtorëve të Shullazit të arrestuar sot, Endrit Qyqja dhe Endrit Zela.
Administratori i kompanisë arabe “Suadi Brother’s Commercial Company”, Ylvi Beqja emri i të cilit është bërë publik në dosjen “Shullazi”, i ka dërguar një letër kryeprokurorit Adriatik Llalla. Beqja rezulton se i ka dhuruar 20 për qind të ish-hotel “Vollgës”, Emiljano Shullazit.
Avokati i tij, Roland Samarxhiu, rendit me detaje të gjitha të dhënat e kësaj prone, që nga blerja e saj në vitin 1994, zhvillimin e 15 proceseve dhe kundër-proceseve gjyqësore dhe deri te kalimi i 20% të saj në emër të Shullazit.
