Arsene Wenger ka vendosur të japë dorëheqjen

Aventura e Arsene Wenger tek Arsenal duket se ka ardhur në fund pas 20 vitesh. Ai që mendohej se do të ishte viti i duhur për “Topçinjtë”, të cilët nuk fitojnë në Premier League prej 12 vitesh, është transformuar në një tjetër sezon zhgënjyes. Situata është përkeqësuar më tej pasi të dielën Watford ka eliminuar Arsenal nga Kupa e Anglisë. Edhe në Champions gjërat nuk shkojnë më mirë, duke parë se lojtarët e Wenger kanë humbur takimin e parë të 1/8-ave kundër Barcelona-s me rezultatin 2-0 dhe kanë pak mundësi që ta përmbysin këtë disavantazh të mërkurën në “Camp Nou”. Këto fakte kanë shtyrë “Daily Mirror” të shkruajë për një largim historik në fund të sezonit dhe të publikojë një listë zëvendësuesish të mundshëm, disa të rinj, disa me eksperiencë dhe disa të tjerë akoma të panjohur. Kalohet nga holandezi Frank de Boer i Ajax-it tek ish-trajneri i Liverpool Brendan Rodgers, nga kiliani Manuel Pellegrini te Diego Pablo Simeone. Pjesë e kësaj liste është edhe Steve Bould, ish-lojtar i Arsenal dhe ndihmësi aktual i Wenger.