Një foshnje është gjetur e pajetë brenda një kazani plehrash në lagjen ”Ali Demi”, në Tiranë.
Burime policore bënë me dije se, ka qenë një qytetar i cili ka njoftuar sallën operative të DVP Tiranë për ta informuar lidhur me ngjarjen. Në vendngjarje kanë shkuar shërbimet e policisë dhe ambulanca. Foshnja e pajetë është transportuar në morg. Një hetim ka nisur nga policia.
“Në lagjen ‘Ali Demi’, mbrapa ish-markatës së vjetër, në koshin e mbeturinave është gjetur pa shenja jete një foshnje i gjinisë mashkullore. Grupi hetimor dhe shërbimet e Policisë ndodhen në vendngjarje dhe vijojnë punën për zbardhjen e plotë të rrethanave të ngjarjes, identifikimin dhe shoqërimin e shtetasit/es që ka hedhur në kosh foshnjën”, njoftoi policia.
Rreth një orë pas njoftimit paraprak lidhur me ngjarjen, burime zyrtare bënë me dije se një e re u shoqërua nga policia. Ajo dyshohet të jetë e ëma e foshnjes që u gjet e braktisur.
“Nga tërësia e veprimeve hetimore u bë i mundur identifikimi si dhe shoqerimi në ambientet e Komisariatit të Policisë Nr.1, i shtetases H.M.,32 vjeçe, banuese në Gjirokastër, për veprime të metejshme hetimore. Nën drejtimin e Prokurorisë vijon puna për zbardhjen e plotë të rrethanave të ngjarjes”, njoftoi policia.
