Pas mbylljes nga koronavirusi, shkollat dhe universitetet do të rihapen në muajin Shtator dhe nxënësit e studentët do të rinisin mësimin në klasa.
Ministrja e Arsimit Besa Shahini deklaroi sot se klasat do të dezinfektohen nga bashkitë vazhdimisht dhe se nxënësit do të udhëzohen se si të ruajnë distancat.
Në një video-konferencë bashkë me ministern e Shëndetësisë Manastiruliu, Shahini deklaroi se po punohet për të hartuar protokollet e plota të nisjes së mësimit në shkolla.
“Skenarët janë të ndryshëm për shkolla të ndryshme, në varësi të numrit të nxënësve,” deklaroi Shahini.
Ministrja Manastirliu tha se “çdo vendim për hapjen e shkollave po koordinohet me përgjegjësi maksimale nga institucionet përgjegjëse për garantimin e masave të distancimit social dhe sigurisht duke vlerësuar në dinamikë situatën epidemiologjike”.
E teksa muaji është njoftuar, pritet ndërkohë të përcaktohet dita se kur nxënësit do të rinisin mësimin në klasa.
