Familja e 29-vjecarit Asllan Kërtusha të vrarë 7 muaj më parë kanë akuzuar prokurorin e cështjes se po mbron vrasësit. Kjo pasi Prokuroria e Durrësit ka ndryshuar akuzën për dy të autorët e dyshuar, nga vrasje me paramendim, në vrasje e kryer në kushtet e tronditjes së thellë psikike.
Dy të pandehurit Gezim dhe Bledar Kajno, xhaxha dhe nip, akuzohen për vrasjen e 29-vjecarit, ngjarje e ndodhur më 01 mars 2016.
Prokurori i çështjes, Drini Pali ka argumentuar se vrasja ka ndodhur në kushtet e tronditjes psikike dhe kjo është arsyeja që ka ndryshuar akuza për dy të akuzuarit.
Gezim Kajno akuzohet për vrasje të kryer ne kushtet e tronditjes së thellë psikike ndërsa Bledar Kajno për mos kallëzim te krimit.
“Analizat psiqiko-ligjore kanë konkluduar se krimi ka ndodhur në kushtet e thella të tronditjes së autorit. Ai ka qenë impulsiv dhe i pakontrolluar si pasoje e situatës së papritur, dhunës dhe fyerjeve të rënda nga ana e viktimës”, ka deklaruar prokurori.
Avokati i dy të akuzuarëve ka pranuar akuzën e ngritur nga prokurori dhe ka kërkuar gjykim të shkurtuar për dy klientët e tij. Ndryshimi i akuzës është kundërshtuar nga familjarët, të cilët kanë akuzuar prokurorin se po mbron vrasësit.
Vrasja e Kërtushës ka ndodhur më 1 mars. Ai ka qenë i ulur në lokalin e njërit prej autorëve dhe në gjendje të dehur ka filluar të fyejë klientët. Pronari i lokalit, Gëzim Kajno i ka kërkuar Kërtushës që të mos fyejë klientët. Pas konfliktit në lokal, sherri u spostua jashtë. Kërtusha tentoi të largohej me taksi, por u nxor me dhunë nga makina nga Gëzim Bledar Kajno, i cili e qëlloi me plumb në zemër.
