Nga dita e nesërme hyjnë në fuqi masat e reja të kalimit të kufirit të vendosura nga Greqia për shkak të situatës së krijuar prej koronavirusit ndërsa burime për Fax bëjnë me dije se është arritur një marrëveshje mes palëve se do kalojnë të gjitha makinat që ndodhen në radhën e gjatë në pikën kufitare të Kakavijës.
Informacioni bazohet edhe tek efektivët e policisë të cilëve u janë dhënë direktivat për të njoftuar dhe menaxhuar situatën.
Përveç emigrantëve që janë në radhë duke filluar nga dita e nesërme të gjithë shtetasit që do nisen në drejtim të Greqisë duhet të pajisen me testin negative të koronavirusit që s’duhet të jetë më i vjetër se 72 orë.
Në rrugën që çon në doganën e Kakavijës janë vendosur 3 postblloqe që do kontrollojnë përgjigjet e testeve të qytetarëve.
Bëhet me dije po ashtu se në Jorgucat, Tepelenë dhe Gjirokastër janë vendosur postblloqe për të njoftuar qytetarët që të mos nisen drejt Kakavijës nëse nuk kanë çertifikatën në gjuhën angleze me përgjigjen e testit negativ.
