Stephan Lichtsteiner ka folur për përballjen e Zvicrës me Serbinë në Botërorin e Rusisë në vitin 2018.
Një duel që mori trajtën e një beteje Shqipëri-Serbi, duke llogaritur që me helvetët aktivizoheshin lojtarë si Granit Xhaka, Xherdan Shaqiri, Blerim Dzemaili, Valon Behrami. Zvicra doli triumfuese me rezultatin 2-1 me autorë të golave Granit Xhakën dhe Xherdan Shaqirin.
Në shënimin e golave festës me simbolin e shqiponjës para tifozëve serbë që bënë Xhaka dhe Shaqiri, iu bashkua edhe Lichtsteiner, i cili i rikthehet ndeshjes plot emocione dhe atij momenti në një prononcim për Blick.
“Solidarizohem gjithmonë me shokët e skuadrës, ky është shkaku pse festova me simbolin e shqiponjës. Ndeshja me Serbinë ishte më ekstremja në aspektin emocional, sepse kishim shumë futbollistë shqiptarë në ekip. Pastaj edhe goli i Shaqirit në minutën e 90, ishte një çmenduri“.
