Një mesazh për vajzat, për t’i dhënë atyre mbështetje, për të luftuar diskriminimin gjinor e për të ndihmuar në fuqizimin e tyre.
Është ky thelbi i një video-mesazhi të publikuar nga Ambasada e Shteteve të Bashkuara të Amerikës në Tiranë, me rastin e Ditës Ndërkombëtare të Vajzave që u shënua një ditë më parë.
Një video mesazh ku vetë ambasadori amerikan Donald Lu shfaqet bashkë me vajzën e tij ndërsa bën xhiro me patina në oborrin përpara rezidencës. “Të jesh baba, do të thotë që t’i mësosh vajzës tënde se mund të arrijë çdo gjë”, thotë Lu në këtë mesazh.
Në video shfaqet edhe prezantuesi Adi Krasta bashkë me vajzën e tij e shumë baballarë të tjerë që përcjellin mesazhe të ndryshme por që bashkohen në një pikë: Të mbështesim vajzat, tu japim mundësinë të arsimohen e të ndjekin ëndrrat e tyre pa i vënë atyre kufizime gjinore.
Ky është një projekt i Ambasadës së SHBA-ve në Tiranë që iu besua gazetares së Report Tv e Shqiptarja.com, Erjona Rusi.
“Faleminderit Ambasadës se SHBA-ve që ma besoi këtë projekt. Faleminderit të gjithë baballarëve që ndanë një copëz jetë me ne, për të përcjellë këtë mesazh”, thotë Rusi.
