Kryetari i Bashkisë së Vlorës, Dritan Leli, ka uruar sot bashkëqytetarët per Diten e Veres, duke zgjedhur një mënyrë të veçantë, atë të mbjelljes së luleve në një nga mjediset në zonën e Skelës.
Së bashku me bashkëshorten dhe dy fëmijët, Leli ka mbjellë 200 tulipanë në lulishten ku është vendosur spiranca, ndërkohë që, ka ftuar të bëjnë të njëjtën gjë edhe qytetarët vlonjatë. “Qyteti ka nevojë për dhurata të tilla simbolike, qoftë edhe një bulbë tulipani”, u shpreh Leli. Ai tha se, duke u bërë të gjithë bashkë në gjeste të tilla simbolike, atëhere edhe qyteti do të ndryshojë. “Me kontributin e të gjithëve, Vlora do të bëhet një qytet më i vizitueshëm, më i bukur, një qytet lule, ashtu siç edhe është vërtetë”, shtoi kryebashkiaku vlonjat. Ai shprehu besimin se, duke u bërë pjesë e nismave të tilla, duke dhuruar një lule në një ditë verë, fëmijët e këtij qyteti dhe prindërit e tyre, do të jenë ata që, së bashku ta bëjnë Vlorën një lule të madhe.
Harrilla 1 Pjesë e festimeve të sotme në Ditën e Verës ishte edhe një koncert organizuar nga Bashkia e qytetit, në zonën e Pedonales, ku ishte ngritur edhe një skenë.
Artistë të vegjël të Qendrës Kulturore të Fëmijëve dhanë një koncert me këngë e valle, duke krijuar një atmosferë festive në këtë zonë të frekuentuar nga qytetarët.
Të pranishmit e shumtë në shesh, i përshëndeti kryebashkiaku Leli, i cili u shpreh mes të tjerash se, këto festa janë nismat e para të vogla për të filluar një rrugë të mirë në shërbim të të ardhmes.
