Sergio Perez do të rikthehet për të garuar në Formulën 1 që këtë fundjavë në Çmimin e Madh të Spanjës.
Piloti meksikan mposhti më në fund virusin Covid – 19, duke fituar në këtë mënyrë edhe të drejtën për të marrë pjesë në garën e Katalunjës. Piloti i ekipit Racing Point rezultoi negativ dhe kaloi kështu me sukses testin e bërë për pandeminë e coronavirusit.
Muajin e kaluar Sergio Perez rezultoi pozitiv dhe për pasojë 30-vjeçari nga Guadalajara u shtrëngua për të hequr dorë nga dy garat e zhvilluara në Mbretërinë e Bashkuar, në Çmimin e Madh të Britanisë si dhe “garën e 70-vjetorit”.
Të dyja këto gara u mbajtën në pistën e Silverstonit, respektivisht në datat 2 dhe 9 gusht dhe në Northamptonshire Perez u zëvendësua nga 32-vjeçari gjerman Nico Hulkenberg.
