Shtohen tensionet në Kakavijë, ashtu si radhët e gjata të automjeteve në të cilat qytetarë presin të kalojnë kufirin për të shkuar në shtetin fqinjë.
Këtë të Premte, disa qytetarë kanë zgjedhur që të bllokojnë rrugën për të gjithë ata që vijnë nga Greqia për në Shqipëri, duke vendosur gurë në të.
Si pasojë e zemërimit për situatën e krijuar, qytetarët kanë marrë këtë vendim, pasi nuk po gjejnë asnjë zgjidhje për problemin e tyre.
Prej tre ditësh, qindra qytetarë janë në pritje për të bërë tamponin dhe për të kaluar drejt Greqisë, por kjo radhë sa vjen dhe po shtohet.
Raportohet se vargu i makinave ka shkuar mbi 10 km – deri në fshatin Jorgucat, në drejtim të Sarandës.
Shkak është bërë tamponi që duhet t’u bëhet çdo qytetarëve, por edhe mbyllja e kësaj pike kufitare të palës greke gjatë natës, nga ora 22:00-06:00. Qytetarët shprehen të indinjuar dhe i bëjnë apel shtetit shqiptar për të ndërhyrë. Mes tyre, ka pasur dhe persona që kanë shfaqur probleme shëndetësore e janë transportuar në spital.
