Një tjetër skaf me një sasi prej 277 kg kanabis sativa është kapur në brigjet italiane në Lecce në orët e pasdites së djeshme.
Operacion ndërkombëtar antidrogë është zhvilluar në ujërat e Adriatikut ku është bërë e mundur kapja e skafit me drogë i nisur nga Shqipëria. Operacioni është kryer nga Skuadra Mobile e Leçes në bashkëpunim me policinë e shqiptare. Skafi është ndalur në San Cataldo, Leçe.
Ai kishte një motor 125 kuaj-fuqi ku në bord kishte ngarkesën prej 277 kg Cannabis Sativa. Janë arrestuar në flagrancë katër shtetas shqiptarë, ku njëri prej tyre ishte skafist ndërsa tre të tjerët e prisnin në breg dhe konkretisht:
E.D, 39 vjeç , banues në Vlorë, drejtuesi i Skafit,
B.S, 29 vjeç, nga Vlora , rezident në Itali,
A.M, 29 vjeç, nga Vlora , rezident në Itali,
G.D, 39 vjeç, nga Vlora , rezident në Itali.
Mes Policisë së Shtetit dhe Policisë Italiane janë shkëmbyer informacionet në kohë reale dhe po vijojnë procedurat hetimore të përbashkëta për zbardhjen e plotë të këtij rasti të trafikut ndërkombëtar të lëndëve narkotike.
