Kryetari i Kuvendit Ilir Meta është takuar sot edhe Presidentin e Greqisë, Prokopis Pavlopulos.
Mediat greke që kanë zbardhur takimin shkruajnë se Pavlopulos i ka dhënë Metës dhe leksione historie, duke i thënë se grekët kanë treguar se si të respektohet historia, ashtu siç na ka mësuar Tukididit dhe Herodoti. “Ata jo vetëm që na i mësuan ne, por gjithë botës”, theksoi Presidenti.
Pavlopulos kërkoi nga qeveria shqiptare respektimin e të drejtave të komunitetit grek në Shqipëri, por edhe nevojën për t’i dhënë fund pezullimit të ngritjes së varrezave greke në Shqipëri.
Nga ana tjetër, presidenti përmendi edhe emigrantët shqiptarë që jetojnë në shtetin fqinj, duke vlerësuar kontributin e tyre.
Nga ana e tij, kryetari i Kuvendit të Shqipërisë, Ilir Meta, falënderoi Presidentin për mikpritjen dhe e ftoi atë të vizitojë Shqipërinë, duke theksuar se “ne jemi të gatshëm për të ndërtuar marrëdhënie shembullore me Greqinë”.
