Deputeti demokrat Eduard Selami ka reaguar pas vizitës së Kreut të Kuvendit Ilir Meta në Greqi, ndërkohë që mes dy vendeve ka një përplasje për çështjen çame.
Selami e ka quajtur të turpshëm reagimin e kryeparlamentarit Ilir Meta, dje në Athinë për çështjen çame, teksa u takua me ministrin e Jashtëm të vendit fqinj, Nikos Kotzias. Ai thotë se ndërsa BE njeh çështjen çame, Meta ngushëllon Greqinë.
“BE njeh çështjen çame, kryetari i Kuvendit ngushëllon Greqinë. Turp” shkruan Selami.
Dje, kreu i Kuvendit Ilir Meta në Athinë pyetur për çështjen çame u shpreh: “Unë besoj se ne jemi në një proces shumë pozitiv të përafrimit të qëndrimeve për shumë çështje të ndryshme të trashëguara nga e kaluara, ku do të doja të veçoja sidomos çështjen e rishikimit të historisë dhe të teksteve të historisë. Në këtë kuadër unë besoj se për çështjen ‘çame’ që ju pyetët, ekzistojnë ende dy qasje të ndryshme le të themi, por unë besoj se me durim dhe mënyrë konstruktive, ne kemi mundësi të ecim për gjithë problemet e së kaluarës drejt një zgjidhjeje ku përfitojnë të dy vendet tona dhe të dy popujt tanë”.
