Agjencia e Sigurimit të Depozitave, në një raport të dërguar në kuvend thekson se bankat e nivelit të dytë në vendin tonë kanë siguruar një fitim kolosal prej 112 milionë euro për vitin 2015. I njëjti raport thekson se fitimi i tyre gjatë vitit që lamë pas është rritur me rreth 33 milionë euro.
Kjo kryesisht si pasojë e uljes së ndjeshme të interesave të depozitave, pas vendimeve të njëpasnjëshme të Bankës së Shqipërisë për reduktimin e kostos së lekut, në përpjekje për të stimuluar ekonominë.
Gjatë vitit 2015, interesat e depozitave zbritën nën nivelin e inflacionit, ndërsa interesat e kredive të reja u ulën më ngadalë. Kjo diferencë mes interesave të këtyre dy produkteve bankar çoi në një fitim të pastër të bankave.
Përfaqësuesit e Bankës së Shqipërisë dhe sistemit financiar e shohin pozitiv faktin që sistemi bankar del me fitim, një shenjë kjo sipas tyre e stabilitetit të tregut financiar dhe garancisë për depozituesit.
Por Fitim i lartë i bankave, në një kohë kur ekonomia nuk po kalon ditë të mira konsiderohet jo normale nga një pjesë e ekspertëve të ekonomisë. Bazuat në këtë logjikë, në nëntor të vitit të kaluar, Autoriteti i Konkurrencës nisi një hetim të përgjithshëm mbi sektorin bankar nisur nga fitimet e larta që realizojnë bankat tregtare në Shqipëri.
Ky vendim u mor pas shqyrtimit të raportit të monitorimit të tregut bankar ku u konstatua se vitet e fundit ai paraqet karakteristikat e një tregu me norma relativisht të larta fitimi në kushtet e stanjacionit të kreditimit, interesa të ulëta të depozitave dhe diferenca relativisht të larta mes kredive dhe depozitave, tendencës në rritje të interesave të letrave me vlerë të qeverisë ka rritje të komisioneve për pagesat kryesisht brenda vendit etj.
