Princ Leka II dhe bashkëshortja e tij, Elia Zaharia, kanë lidhur sot martesën e tyre, me një ceremoni madhështore që ka mbledhur familjet mbretërore nga e gjithë bota.
Ceremoniali nisi me celebrimin e çiftit në mjediset e Pallatit të Brigadave dhe ka vijuar me një pritje në Rezidencën pranë Galerisë së Arteve dhe mbyllet me darkën festive përsëri në Pallatin e Brigadave.
Në darkën e dasmës do të jenë rreth 300 të ftuar, ndër ta do të jenë Princi i Luksemburgut, Princët nga Lihtneshtejni, LSM Princesha Lalla Salma e Marokut, LSP Farah Diba, MS Mbretëresha Sofia e Spanjës etj.
Të ftuar në celebrim janë edhe krerët më të lartë të shtetit shqiptar, Presidenti i Republikës, Bujar Nishani, Kryeministri Edi Rama, Kryetari i Parlamentit, Ilir Meta, ministra të qeverisë etj.
Në orën 12.15 parashikohet mbërritja e çiftit dhe të ftuarëve në festën në Oborr, ku Princ Leka do të mbajë një fjalim. Festa parashikohet të zgjasë rreth dy orë.
Festa do të hapet me kalimin e çifteve, të kryesuar nga Princi Leka dhe Princeshë Elia Zaharia dhe fjalimin përshëndetës të Skënder Zogu rreth orës 20.50.
Më pas gjatë mbrëmjes do të mbajnë fjalën e tyre, edhe babai i Elia Zaharias, Gjergj Zaharia, Princ Leka II dhe Princesha Elia, për ta finalizuar festën me çastin e tortës në orën 24.00.
