Marrëveshja e 5 qershorit, e dakordësuar mes PS dhe PD me ndërmjetësimin e ndërkombëatrëve, do të miratohet në seancën e ditës së sotme.
Pas paktit politik mes PS dhe 2 kryetarëve të grupeve parlamentare ditën e martë, kryeministri Edi Rama u shpreh optimist se do ti sigurojë 84 votat e nevojshme për ndryshimet në Kodin Zgjedhor.
Në harkun kohor të 7 ditëve, parlamenti pritet të mblidhet edhe në 3 seanca të tjera, 27, 28 dhe 30 korrik.
Përveç projektligjeve të caktuara, në këto seanca do të miratohet edhe raporti i Komisionit Hetimor për Presidentin Ilir Meta. Sipas këtij raporti kreu i shtetit nuk është në kushte për t’u shkarkuar nga detyra për dekretin e 30 qershorit dhe emërimet në Kushtetuese.
Por në seancën e fundit të këtij sesioni parlamentar, më 30 korrik, PS dhe deputetët e opoziës parlamentare do të diskutojnë dhe më pas pritet të miratojnë ndryshimet kushtetuese që do të çojnë në hapjen e pjesshme të listave, heqjen e koalicioneve parazgjedhore dhe ndryshimin e pragut elektoral.
