Goditet një tjetër rast i trafikimit të lëndëve narkotike. Finalizohet me sukses Operacioni anti-drogë i koduar “Eklipsi” teksa janë sekuestruar rreth 25 kg lëndë narkotike e dyshuar Cannabis Sativa. Arrestohen në flagrancë 4 shtetas si dhe ndiqen në gjendje të lirë dy shtetas të tjerë.
Për arsye hetimi operacioni nuk është bërë publik.
Më datë 05.10.2016 Specialistët për Narkotikët, në Drejtorinë Vendore të Policisë Kukës, finalizuan me sukses Operacionin anti-drogë të koduar “Eklipsi”, ku u bë arrestimi në flagrancë i shtetasve:
Jetmir Dega, 29 vjeç , banues në Tiranë.
Agron Çakrri, 37 vjeç, banues në Tropojë.
Sajmir Muça, 38 vjeç, banues në Tropojë.
Erlind Pali, 33 vjeç, banues në Tiranë.
Si dhe i dy shtetasëve të mëposhtëm, por që pas vendimit të Gjykatës këta dy shtetas do ndiqen në gjendje të lirë dhe konkretisht: S.M., 53 vjeç, banues në Tropojë. P.M, 47 vjeç, banues në Tropojë.
Arrestimi i këtyre shtetasve u bë pasi mbi bazën e informacioneve të marra në rrugë operative se në drejtim të Kukësit, po lëviznin dy automjete, me targa AA 768 MU dhe AA 368 HD, njëra pas tjetrës dhe se në njërin prej automjeteve mund të kishte lëndë narkotike, janë organizuar shërbimet ku është bërë e mundur ndalimi i automjeteve sëbashku me 6 persona. Gjatë kontrollit të ushtruar në automjetin tip “Fiat”, me targa AA 368 HD, me drejtues mjeti shtetasin Jetmir Dega, në pjesën e bagazhit, u gjetën dhe u sekuestruan rreth 25 kg lëndë narkotike e dyshuar Cannabis Sativa.
Në cilësinë e provës materiale u sekuestruan : – 25 kg lëndë narkotike e dyshuar si Cannabis Sativa – automjetet tip “Fiat”, me targa AA 368 HD, dhe tip “Benz”, me targa AA768 MU . Më datë 07.10.2016 Gjykata e Rrethit Gjyqësor Kukës vendosi masën e sigurisë “Arrest me burg”, për katër persona dhe masën e sigurisë “Detyrim paraqitje”, për dy të tjerët Vijojnë hetimet për zbardhjen e plotë të kësaj ngjarje.
