Aktori Fuat Boçi është ndarë nga jeta në moshën 89-vjeçare.
Ai njihet si një prej aktorëve themelues të Estradës së Fierit, në vitin 1957.
Fuat Boçi njihet për mbi 600 role në filmat dhe estradën shqiptare, mes të cilëve më të njohurit janë “Zeneli” te komedia “Pas vdekjes” e Çajupit, dajo tek komedia “Shi në plazh”, Sotiri tek komedia “Një budalla e gjysmë” etj.
Fuat Boçi është nderuar me titujt “Qytetar Nderi i Fierit” dhe “Artist i merituar”.
Reagimi i Metës
Lidhur me lajmin e hidhur reagoi dhe Presidenti Ilir Meta.
Në një postim në rrjetet sociale, Meta shkruan:
Me hidhërim mësova lajmin e ndarjes nga jeta të aktorit të spikatur të humorit shqiptar, njërit prej artistëve më të dashur të Fierit, Fuat Boci, i cili do të mbahet mend përherë për rolet gazmore, skeçet dhe paroditë, nëpërmjet të cilave stigmatizoi me mençuri e talent të rrallë plagët sociale të shoqërisë shqiptare.
Me mbi 600 role në skenë, Fuat Boci u bë proverbial dhe shumë i dashur për publikun veçanërisht me monologun tek skeçi “Doni më për Belulin?”, si dhe falë intepretimeve mjeshtërore për të cilat meritoi respektin dhe duartrokitjet e shumë gjeneratave.
Duke ndarë dhimbjen e thellë për humbjen e këtij artisti të madh, i përcjell ngushëllimet më të sinqerta familjes, të afërmve dhe të gjithë komunitetit të artistëve shqiptarë, veçanërisht qytetarëve të Fierit e të mbarë trevës së Myzeqesë që aq shumë e donte!
