Genc Rulit, ish-deputet dhe ish-ministër në qeverisjen e PD, i është kërkuar të jetë pjesë e një komisioni që do të merret me përzgjedhjen e kandidatëve të propozuar nga strukturat e bazës së PD për deputet. Nga Ruli nuk ka pasur asnjë reagim publik nëse e ka pranuar ose jo këtë ftesë, edhe pse në selinë e demokratëve janë të bindur që ai do të angazhohet në këtë proces.
E ndërsa pritet një përgjigje zyrtare nga Ruli, një tjetër emër i njohur, diplomati Besnik Mustafaj, ish-deputet dhe ish-ministër, pritet zyrtarisht të jetë pjesë e këtij komisioni.
Burime nga PD shprehen se të dy politikanët nuk kanë shprehur ambicie për të kandiduar, sikundër kanë shprehur gadishmërinë për të ndihmuar PD në këtë proces, ndaj ata nuk kanë asnjë konflikt interesi me veprimtarinë që do të kryejnë përsa i takon përzgjedhjes së kandidaturave që do të depozitohen.
Pjesë e këtij Komisioni pritet të jetë edhe Halim Kosova, i cili drejton Komisionin e Etikës dhe Pastërtisë së Figurës brenda PD.
Dhe paralelisht me formalizimin e një komisioni që duket se do të kalojë në sitë emrat e propozuar, të cilët më pas do t´i nënshtrohen votimit nga anëtarësia e PD sipas parimit një anëtar një votë, faza e parë e procesit të kandidatëve është drejt përfundimit.
Referuar të dhënave nga PD, procesi mund të quhet i përmbyllur në mbi 85 %, ndërsa mes emrave të propozuar ka shumë personalitete që i përkasin shoqërisë civile apo botës akademike, pa qenë pjesë e strukturave të PD. Burimet shprehen se në qytetet Tiranë, Durrës, Vlorë e Lezhë nuk kanë munguar surprizat lidhur me emrat e propozuar, kjo për faktin se ka shumë emra të rinj, madje me një mbështetje propozimesh më shumë se ish-deputetët.
Emrat e propozuar do të kalojnë në sitën e Komisionit të përzgjedhjes së kandidatëve, proces që do të vijojë përgjatë muajit gusht dhe ndoshta edhe në javën e parë të shtatorit.
Më pas do të jetë anëtarësia që do të votojë emrat që do të përzgjidhen dhe në fund ato kalojnë në filtrin e Kryesisë dhe Këshillit Kombëtar.
