Ish-anëtari i Gjykatës së Strasburgut, Ledi Bianku, ka reaguar lidhur me debatin mbi ndryshimet Kushtetuese në vend lidhur me koalicionet parazgjedhore dhe listat e hapura.
Sipas tij, disa rregulla elektorale në Kushtetutë apo në ligjin zgjedhor nuk duhen prekur pa disa garanci.
Lidhur me pragun elektoral, Bianku sjell një vendim të Gjykatës së Strasburgut. Vendimi thotë qartë se pragu elektoral nuk mund të ndryshohet, nëse nuk lejohen koalicionet dhe nëse vendi nuk ka një gjykatë funksionale Kushtetuese.
“Për kujtesë Këshillit Politik, etj – në Yumak dhe Sadak, Turqisë, 2008, Gjykata e Strasburgut u shpreh se pragu elektoral mund të pranohet, por kur ka sisteme korigjuese, të tilla si koalicionet zgjedhore dhe kur ka garanci institucionale dhe procedurale – Gjykata Kushtetuese!!!”, shkruan ish anëtari i Gjykatës së Strasburgut në një postim në Twitter.
Reagimi i Ledi Biankut vjen një ditë para mbledhjes së Këshillit Politik ku do të diskutohet propozimi për ndryshimet kushtetuese.
Një nga pikat që shtrohet për diskutim është edhe pragu elektoral. Deputetët e opozitës parlamentare kërkuan fillimisht që pragu të ngrihej nga 3% që është aktualisht, në 5%, por më vonë e kërkuan 2%.
Në zgjedhjet e fundit, pragun 3% e kaluan vetëm 3 parti politike, PS, PD dhe LSI. Palët në parlament kanë vendosur që këtë çështje ta përfshijnë në Kodin Zgjedhor dhe akoma nuk ka një vendim përfundimtar.
