Komuniteti Shqiptar në Amerikë nëpërmjet një njoftimi ka bërë me dije se momentalisht në qytezën e Waterburyt në Connecticut po mundëson teste të CoVid-19 falas.
Kjo iniciativë u bë e mundur në bashkëpunim me Qendrën Shëndetësore të zonës. Testet mund ti bëjnë edhe persona që nuk kanë simptoma.
Në shtetin e Connecticut deri më tani janë prekur 47750 persona ku 4389 kanë ndërruar jetë dhe 18415 janë shëruar.
Waterbury është një zonë me një popullsi prej rreth 110000 mijë banorësh dhe ka pasur 2100 raste deri më tani ku rreth 200 kanë ndërruar jetë.
Për “Diaspora Shqiptare”, imami i Komunitetit Shqiptaro Amerikan në Connecticut (AAMC), Gazmend Aga ka dhënë disa detaje më shumë.
“Testimi për gjithë komunitetin e Waterbury është një event i organizuar nga Presidentja e AAMC, Albana Lame dhe Community Health Center.
Që në fillimet e pandemisë, anëtarë të komunitetit kanë kontribuar në prodhimin dhe shpërndarjen e maskave falas.
Jemi krenarë me punën e bërë të shumë shqiptarëve mjekë, infermierë etj.
Të prekur nga Covid19 ka pasur edhe nga komuniteti ynë. Fatkeqësisht, përveç të infektuarve ka pasur edhe viktima nga shqiptaro-amerikanët. Zoti i mëshiroftë dhe familjarëve i dhëntë durim.
Mos të harrojmë, që kjo periudhë ka pasur edhe një ndikim në psikologjinë e njerëzve. Komunitetet në të cilat familja e madhe ka qenë më e bashkuar, e kanë kaluar më lehtë se të tjerat. Mund të them se në këtë drejtim, familja shqiptare mbetet një aspekt i rëndësishëm në komunitetin tonë.
Aktualisht shteti i Connecticut është një nga shtetet me menaxhimin më të mirë të Covid19. Kjo në saj të punonjësve të shëndetësisë, politikave të sakta dhe ç’është më e rëndësishmja, vetëdijes shoqërore. Tashmë njerëzit mbajnë gjithmonë maska në vendet e mbyllura.
Komuniteti Mysliman Shqiptaro Amerikan(AAMC) e ka hapur xhaminë, por sipas udhëzimeve përkatëse. Aktivitetet e tjera akoma nuk kanë rinisur.
Do të vazhdojmë të jemi aktivë në përballimin e Covid-19”.
/diasporashqiptare.al/
