Kryetari i Partisë Demokratike, Lulzim Basha, pas analizës së misionit të përbashkët të Policisë së Shtetit me Guardia di Finanzia, deklaroi se rezulton pesëfishim i sipërfaqes së mbjellë me drogë në territorin shqiptar.
“Pas vrojtimit të 17% të territorit të Shqipërisë, rezulton pesëfishim i sipërfaqes së mbjellur me drogë. Nga 44.7 hektarë vitin e kaluar, në 213,7 hektarë këtë vit të mbjellura me drogë. Bëhet fjalë jo për të gjithë territorin, por për vetëm 17%. Pra, 83% e territorit nuk është vrojtuar ende”, tha Basha.
“Raportimet e medias italiane tregojnë për dhjetëra ton drogë që vijnë nga Shqipëria. Nga llogaritë tona, 10 000 ton drogë është prodhimi minimal në Shqipëri gjatë vitit. Jemi kthyer në hambarin më të madh të drogës në Europë. Kjo sepse parandalimi i kultivimit të drogës, do të thotë që kjo qeveri të sulmojë interesat e veta”, shtoi Basha.
Kreu i PD-së akuzoi Ramën dhe Tahirin si njerëzit që janë pas këtij trafiku. “Shqipëria ka hyrë në syrin e ciklonit për drogën, mediat e lira të perëndimit kanë ngritur alarmin, Rama krihet para ekranit. Këta janë alkaponet e drogës, në bashkëpunim të ngushtë me kartelin e drogës, sot Tahiri duhet të ishte ministër i shkarkuar, por ata po ndërtojnë perandori financiare me qindra milionë euro, para të pista që Rama i ka në plan ti fusë në zgjedhjet e ardhme para të krimit që sipas mediave po stabilizojnë jo vetëm vendin por edhe rajonit”, tha Basha.
