Një sherr në familje ka çuar në përdorimin e armëve. Pas ngjarjes së djeshme në Durrës ku mbetën të plagosur me armë zjarri tre persona, një tjetër ngjarje e rëndë ka ndodhur sot pasdite.
Nga të dhënat e para mësohet se djali ka qëlluar me armë babain e tij pas një konflikti në familje.
Si pasojë 51-vjeçari ka mbetur i plagosur në këmbë dhe është dërguar me urgjencë në spitalin e Durrësit për të marrë ndihmën mjekësore. Mësohet se 51-vjeçari Nerim Mane, ndodhet jashtë rrezikut për jetën.
“Me të marrë njoftim kanë shkuar menjëherë në vendngjarje Efektivat e Policisë, të cilët në sajë të veprimeve hetimore të menjëhershme kanë bëre të mundur identifikimin e autorit. Plagosja ka ardhur si pasojë e një konflikti për motive të dobëta që i dëmtuari ka pasur me djalin e tij shtetasin Medrit Mane, 25 vjeç. Ky i fundit në debat e sipër ka qëlluar me armë zjarri, në këmbë babain e tij me një pistoletë të kalibrit të vogël”, thuhet në njoftimin e policisë.
Autori i ngjarjes rezulton të jetë person me precedentë penalë të mëparshëm në fushën e veprave penale kundër narkotikëve. Sakaq, policia po punon për kapjen e 25-vjeçarit Medrit Mane.
Edhe mbrëmjen e djeshme në qytetin bregdetar ka patur të shtëna me armë zjarri, ku si pasojë mbetën të plagosur dy persona.
