Imuniteti ndaj Covid-19 mund të zgjasë vetëm pak muaj, sipas një studimi në Mbretërinë e Bashkuar që ngre dyshime mbi efektivitetin e një vaksine të mundshme ndaj koronavirusit. Kundërpërgjigja e antitrupave ndaj koronavirusit arrin kulmin 3 javë pas shfaqjes fillestare të simptomave dhe më pas nis rënien në 2-3 muaj, sipas një hulumtimi të kolegjit Kings të Londrës.
Studimi vlerësoi nivelet e antitrupave të 64 pacientëve dhe 6 punonjësve të shëndetësisë që ishin testuar pozitiv për virusin mes Marsit dhe Qershorit. Hulumtuesit monitoruan gjithashtu 31 persona staf që dolën vullnetarë për testime të rregullta të antitrupave.
Hulumtuesit zbuluan se nivelet e antitrupave që mund të luftojnë koronavirusin nisin rënien pas 3 javësh nga shfaqja e simptomave. Ndërkohë që 60% e njerëzve të testuar kishin nivele të forta të antirupave pas një mesatareje prej 23 ditësh nga simptomat e para, vetëm 16.7% e atyre të testuar kishin këtë nivel të fortë të antitrupave pas 65 ditësh nga shfaqja e simptomave. Niveli i antitrupave ishte më i lartë tek ata që e përjetuan ashpër sëmundjen, por nuk ka një shpjegim për këtë.
Hulumtuesit zbuluan se kundërpërgjigja imunitare ndaj Covid-19 ishte e ngjashme me atë të koronaviruseve të tjera si SARS dhe koronaviruseve sezonale të lidhura me gripin e zakonshëm ku niveli i antitrupave zbutet nga 12 javë në 12-35 muaj pas infeksionit. Studimi ngre pyetje mbi mbrojtjen e një individi që ka kaluar koronavirusin ndaj një infeksioni të dytë si dhe mbi efektivitetin e një vaksine të mundshme.
Organizata Botërore e Shëndetësisë deklaroi në nisje të javës se pacientët që shërohen nga Covid-19 mund të marrin virusin përsëri, duke përmendur studime të ngjashme që sugjerojnë se imuniteti zbutet pas pak muajsh.
Ndërkohë, një studim i publikuar tek revista mjekësore “Lancet” javën e kaluar, tregoi se antitrupat nda Covid-19 në popullsinë e Spanjës ishin të pamjaftueshme për të ofruar “imunitet në tufë”, që i referohet rastit kur një populate i lejohet një masë e ekspozimit ndaj virusit, në mënyrë që të ndërtohet imunitet për popullsinë e përgjithshme. /SCAN
