KED-ja do të shqyrtojë të premten dosjet e 10 kandidatëve, që i janë çuar institucionit nga Presidenca dhe nga Kuvendi.
KED do të marrë vendim se cilët nga 10 pretendentët do të kualifikojë dhe cilët do të ndalojë, bazuar në vlerësimin e kritereve që ata plotësojnë për të zënë një vend në Gjykatën Kushtetuese.
Duket se pas largimit të Ardian Dvoranit, Këshilli i Emërimeve në Drejtësi, nën drejtimin e Vitore Tushës, po vepron për bërjen funksionale të Gjykatës Kushtetuese.
Kjo gjykatë që prej marsit të 2018-ës nuk ka funksionuar, ndërsa aktualisht është me vetëm 4 anëtarë.
Nevojiten dhe dy të tjerë që të plotësohet kuorumi i mjaftueshëm prej 6 anëtarësh, që të mund të shqyrtojë dhe marrë vendime për çështje sensitive që janë ankimuar deri më tani.
Për të shmangur përsëritjen e përplasjeve që ndodhën gjatë vitit të shkuar mes Presidentit dhe Kuvendit, Meta dhe Ruçi janë dakordësuar që të koordinohen për kandidatët që ndodhen në të dy listat.
Me ngritjen e Gjykatës Kushtetuese pritet të shqyrtohet ligjshmëria e zgjedhjeve të 30 qershorit, që u zhvilluan nga një dekret i shfuqizuar nga Presidenti, si dhe çështja e shembjes së godinës së Teatrit Kombëtar.
Vendimi i fundit i marrë nga Kolegji i Gjykatës është ai i datës 3 korrik, kur ka rrëzuar kërkesën e Arben Malajt, për të vlerësuar shkarkimin e tij nga detyra e anëtarit të Këshillit Mbikëqyrës të Bankës së Shqipërisë.
