Deputeti socialist, Pandeli Majko e nisi fjalën e tij në Parlament duke u kërkuar deputetëve të Partisë Demokratike që t’iu kërkojnë ndjesë tropojanëve, për ndërtimin e HEC-ve në Luginën e Valbonës.
Majko theksoi se HEC-et i lejoi PD dhe dhanë lejen kryeministri dhe ministrat e qeverisë së djathtë.
Më tej Majko i bëri thirrje Partisë Demokratike të votojë ligjet e Reformës në Drejtësi. Sipas Majkos ka një arsye përse kriminelët kalojnë në politikë, pasi e dinë që askush nuk dënohet.
“Ne kriminelët i kemi në politikë se nuk kemi gjykatës e prokurorë. Shqipëria sot vuan për tre gjykatës dhe dy prokurorë që të kenë guximin ti thonë ‘a-së’ ‘a’ dhe ‘b-së’ b. Gjithë eseanca e Reformës është: nuk do ti votojmë ne gjykatësit dhe prokurorët. Por ne jo, i duam, i duam, i duam këtej sepse duam tu themi që i kemi ne në dorë. U ngrit ish kryeministri juaj, ish Presidenti i Republikës dhe tha: “ju doni të hani sistemin e drejtësisë? Jo. Do tu hajë juve sistemi i drejtësisë”. Çfarë do të thotë kjo? Kjo është vërtetë e dhimbshme sepse ne na duket sikur e kemi nën kontroll sistemin e drejtësisë. Në fakt sistemi i drejtësisë na ka marrë neve peng. Sepse kemi ecur me logjikën, ne ju zgjedhim, ju nuk na dënoni. Pastaj mos u çudisni pse vijnë kriminelët. Vijnë kriminelët sepse ne nuk i dënojmë”, tha Majko.
