Ish-ministri i Shëndetësisë Tritan Shehu ka reaguar pas vetëvrasjes së 21-vjeçares, duke kërkuar ndalimin e futjes së fostoksinës në Shqipëri.
“Dy vetëvrasje të tjera nga fostoksina! Rritet pafundësisht numri i vetëvrasjeve nga fostoksina në vend. Fatkeqësisht kjo, lidhet me elementet sociale, ekonomike, psikologjike. Lidhet gjithashtu edhe me faktin alarmant që fostoksina vazhdon të përdoret si pesticid te ne.
Gjendet ne fitofarmacitë, por edhe nga shumë furnizues të tjerë të pa autorizuar! Në shumicën dërrmuese të vendeve të botës fostoksina është hequr nga farmakopeja bujqësore dhe nuk përdoret, pra as nuk qarkullon e as mund ta gjesh. Qarkullon aktualisht vetëm në Shqipëri dhe në Indi, por edhe në Indi tregtohet me një ambalazh që nuk mund ta gëlltisësh.
Kjo pikërisht për shkak të rreziqeve të mëdha vdekjeprurëse qa ka kur merret nga njeriu.
Vdekja në këto raste është pothuajse e sigurt, pavarësisht ndihmës mjekësore. Fostoksina kudo është zëvendësuar për këto arsye me pesticide të tjera, që nuk rrezikojnë jetën e njeriut.
Pavarësisht kostos më të lartë që kanë këto pesticide alternative, interesave që mund të ekzistojnë, duhet ndaluar kategorikisht edhe në Shqipëri, importi, tregtimi e përdorimi i fostoksinës dhe lejuar vetëm përdorimi i tyre. Ministria e Bujqësisë dhe institucionet e tjera përgjegjëse duhet të veprojnë. Në rast të kundërt vdekje të tjera tragjike do të na ndjekin dhe dikush duhet të mbajë përgjegjësi”, deklaroi kreu i Departamentit të Shëndetësisë në PD.
