Afrimet dhe riafrimet e reja në Partinë Demokratike nuk duhet të cënojnë ata që në 7 vjet rresht kanë bërë opozitë.Kështu u shpreh gjatë intervistës së saj për “Çim Peka LIVE” ish-deputetja demokrate, Grida Duma.
Sipas saj, PD duhet të maksimizojë asetet e saj.
“Unë jam për figura të shkolluara në perëndim, por secili do të ketë mendimin e tij. Ky është maksimizim i aseteve që sa herë aktivizohen, me gjithë përvojën e tyre, duhet të akomodohen përmes rregullave të lojës pa cënuar ata që kanë sakrifikuar në 7 vite, nga protesta te aktivitete konkrete.
Rregullat e lojës, do të tentoja të sigurohen që asetet të mos demotivojnë ata që kanë bërë opozitë reale në 7 vjet”, tha Duma.
Ndërkohë gjatë një debati me gazetarin Bledian Koka nëse duhet të afrohen vetëm ata të shkolluar në Perëndim duke lënë mënjanë ata që studiojnë dhe kanë studiuar në Shqipëri, ish-deputetja u shpreh se të shkolluarit jashtë dinë si punohet në grup më mirë.
“PD duhet të ketë në linjën e parë studentët. Ne punojmë shumë pak në grup. Ata që studiojnë në perëndim e kanë më të fortë. Unë këtë defekt nuk ja ve PD, por shoqërisë civile. Ne duhet të kemi tharmin e çdo përfaquesi në PD. Apriori ne duhet ti ndihmojmë ata që të futen në botën e Shqipërisë pasi herë pas here janë naiv”, u shpreh Grida Duma.
