Deputetja e Partisë Demokratike Albana Vokshi ka dhënë alarmin sot se të sëmurët me kancer janë shtuar me shifra të frikshme nga një vit më përpara. Vokshi ka thënë se të sëmurët janë braktisur, ndërsa akuzoi Ministrin e Shëndetësisë Ilir Beqja për korrupsion.
Deputetja demokrate Albana Vokshi tha se në spitalin Onkologjik në Qendrën Spitalore Universitare “Nënë Tereza” është shkurtuar numri i shtretërve duke u mohuar kimioterapinë pacientëve, ndërsa sipas saj prej 4 muajsh nuk funksionon as aparatura e mamografisë. Sipas Vokshit qeveria do ta japë me koncesion edhe këtë shërbim.
Vokshi tha se janë diagnostikuar me tumor 1192 pacientë më shumë krahasuar me një vit më parë.
“192 pacientë më shumë se një vit më parë. Por një statistikë e tillë nuk e ka shqetësuar aspak koordinatorin e korrupsionit, i cili ka shkurtuar shtretërit në shërbimin onkologjik, duke iu mohuar kimioterapinë dhe duke i torturuar për vdekje mijëra pacientë”, tha Vokshi.
Sipas Vokshit në QSUT prej 4 muajsh nuk funksionon aparatura e mamografisë, ndërsa deklaroi se dhe ky shërbim po përgatitet të jepet me koncension.
“Çdo grua që ka bërë mamografinë është e destinuar të presë dëshpërimisht mbase në rastet më fatkeqe edhe të humbë jetën…derisa Beqaj të mbyllë pazarin e rradhës për leximin e mamografive…Vjedhja e radhës me sloganin “Paratë e Shëndetësisë për Partneritetin e Partisë” po firmoset në zyrën e Beqajt për tu lancuar si “propaganda e tetorit” kundër kancerit të gjirit”, tha Vokshi.
Deputetja theksoi seQeveria po shpërdoron fondet për shëndetin, ndërsa në 2 vitet e fundit fushatat sensibilizuese kanë rënë ndjeshëm.
