Një tragjedi u zbulua mbrëmjen e djeshme në zonën e Kombinatit në Tiranë, ku u gjetën të pajetë nënë e bijë, ndërsa vajza tjetër u transportua drejt spitalit në gjendje të rënduar shëndetësore.
Të tre pjesëtarët e të njëjtës familje ishin besimtare të Jehovait.
Pas njoftimeve nga familjarët dhe fqinjët, policia ka ndërhyrë në banesë ku gjeti, në apartamentin e tyre në Kombinat, vajzën Anisa të vdekur prej kohësh, të dekompozuar dhe të lyer me vaj e uthull nga nëna e saj dhe motra; gjeti trupin e mamasë, Zhanetës, të vdekur dhe Blertën thuajse në grahmat e fundit.
Të trija kishin kohë të paushqyera. Dyshimet janë të forta se ato ishin ndjekëse të një besimi fetar, pasi në apartamentin e tyre ishin gjetur material propagandistike fetare.
Kryefamiljari kishte ndërruar jetë pesë vite më parë në Përmet dhe pas vdekjes së tij, nëna me vajzat qenë transferuar në Tiranë.
Në këtë fotografi shfaqet Zhaneta Josifi me dy vajzat e saj, të ndjerën Anisa dhe Blertën që ndodhet në gjendje të rëndë në spital.
