Ditën e djeshme (21 qershor) u zhvilluan zgjedhje të trefishta në Serbi, parlamentare, vendore, dhe për rajonet autonome. U zhvilluan zgjedhje edhe në Kosovë, në komunat me shumicë serbe, por ndërkohë 4 deputetë shqiptarë do të futen në parlamentin serb.
Në një intervistë për ”Ora News”, politologu dhe anëtari i Lëvizjes Vetëvendosje Arbër Zaimi, tha se Serbia ka zhvilluar zgjedhje në pjesë të Kosovës që ajo i kontrollon në mënyrë kriminale. Sipas tij, kjo dëshmon se Serbia e minon dhe e lufton sovranitetin e Kosovës.
Arbër Zaimi: ”Në Kosovë nuk janë zhvilluar zgjedhje, por Serbia ka zhvilluar zgjedhje në pjesë të Kosovës që ajo i kontrollon në mënyrë kriminale paralele. Nuk janë zhvilluar zgjedhje në Kosovë, por le të themi është dëshmuar që Serbia e minon, nuk e njeh, e kundërshton dhe e lufton sovranitetin dhe kontrollin republikan të Kosovës. Është një lloj dështimi në Serbi.”
Lidhur me zgjedhjet në Serbi, Zaimi i shikon si një kalim nga autoritarizmi në totalitarizëm, sepse rreth 90% e parlamentit do të kontrollohet nga Partia Progresive e presidentit Vuçiç, pasi opozita nuk mori pjesë në zgjedhje.
Arbër Zaimi: ”Përsa i përket çështjes së zgjedhjeve në Serbi, tendenca është e qartë. Një tendencë e autoritarizmit tashmë e stabilizuar i cili po tenton të bëhet gjithnjë e më shumë total. Kemi një kalim jo më prej demokracisë në autoritarizëm, po prej autoritarizmit në totalitarizëm. Opozita serbe nuk ka marrë pjesë në zgjedhje në masë të madhe dhe kemi rreth 90% të vendeve në Kuvendin e Serbisë, kontrollohet nga Partia Progresive e presidentit Aleksandër Vuçiç, dhe aleatëve të tij qeverisës. Një qeveri që kontrollon 90% të Kuvendit. Partia Progresive e ka përdorur si emër kryesor të fushatës emrin e Vuçiçit. Pra, ashtu si ndodh në vendet jo demokratike, ose moniste, nuk ka një fshehje të lidhjes së presidentit me partinë. Kemi një përzierje të institucioneve, nuk kemi një ndarje të pushteteve, opozita është tërësisht e përjashtuar.”
Zgjedhjet në Serbi, Zaimi i krahason me zgjedhjet lokale të zhvilluara në Shqipëri, ku opozita nuk mori pjesë në zgjedhje. Sipas tij, nëse nuk ka opozitë, do të ketë një pushtet total të zhveshur.
Arbër Zaimi: ”Nuk është modeli i vetëm Serbia në rajonin tonë, por kemi edhe rastin e Shqipërisë ku janë zhvilluar zgjedhjet pa pjesëmarrjen e opozitës. Ato ishin zgjedhje lokale, por kemi një rezultat ku i kontrollon një parti e vetme njësitë vendore. Mbase dikush se opozita sa për sy e faqe nuk i duhet askujt, sa për të maskuar kontrollin, por kur hiqet edhe ambalazhi sa për sy e faqe çfarë kemi? Kemi vetëm pushtetin total të zhveshur. Nuk është se kur hiqet ambalazhi po shkohet drejt një brendësie më të mirë të demokracisë.”
