Viktor Marku, i shpallur në kërkim policor, si i dyshuar në vrasjen e Hekuran Billës, raportohet se është arrestuar në Tuz të Malit të Zi.
Burime policore bëjnë me dije me Marku është arrestuar nga policia malazeze, pas njoftimeve të dhëna nga agjensitë ligjzbatuese shqiptare, që kanë ndjekur lëvizjet e Markut.
Arrestimi i Markut ka ndodhur në afërsi të Podgoricës, ndërsa nga raportimet operacioni është zhvilluar në bashkëpunim mes policisë shqiptare dhe asaj të Malit të Zi.
Pas ekzekutimit të Hekuran Billës në Tiranë, policia po heton në disa pista, por më e forta është ajo e hakmarrjes.
Policia e Tiranës ka tentuar të marrë në pyetje Viktor Markun, vëllain e Prel Markut, i cili u vra nga Hekuran Billa në vitin 2006 në Britaninë e Madhe.
Gjatë kontrolleve të kryra në banesën e Markut, policia nuk e ka gjetur në banesë, por ndërkohë e kanë shpallur në kërkim si të dyshuar për atentatin ndaj Billës.
Gjatë marrjes në pyetje familjarët e tjerë të Markut kanë dëshmuar se konfliktet e vjetra i kanë sheshuar, duke e quajtur histori të mbyllur.
Por grupi hetimor ka sërish dyshime në lidhje me deklaratat e familjarëve dhe ka njoftuar në pikat kufitare për 34 vjeçarin e shpallur në kërkim, i cili dyshohet të jetë atentatori kryesor i vrasjes së Hekuran Billës mbrëmjen e së enjtes në Zonën e Komunës së Parisit.
Hekuran Billa ishte ekstraduar në Shqipëri dhe ishte dënuar me burgim të përjetshëm për vrasjen e Prel Markut, por ai u lirua pas disa vendimeve të dhëna nga drejtësia shqiptare.
Pak ditë para atentatit ai ishte kthyer nga Belgjika. Ndërkohë Inspektori i Lartë i Drejtësisë ka nisur verifikimet e vendimeve që cuan në lirimin e Billës, edhe pse atij i ishte njohur në Shqipëri dënimi me burg përjetë që kishte marrë në Britani.
Ditën e djeshme policia arrestoi nipin e Prel Markut, Sebastian Mali, i dyshuar si bashkëpunëtor në ekzekutimin e Hekuran Billës.
Ai u arrestua në një lokal në zonën e ish-Parkut të Autobuzëve, ndërkohë që nuk ka pranuar të ketë lidhje me ngjarjen përpara grupit hetimor.
Billa u vra teksa po lëvizte me makinë, ku disa persona që i bënë pritë me dy automjete e qëlluan me 11 plumba duke e lënë të vdekur në vend.
