United-West Ham, në “Old Trafford” nuk ka fitues

Dy francezë kanë qenë protagonistë të çerekfinales së Kupës së Anglisë që është zhvilluar pasditen e sotme mes Manchester United dhe West Ham. Fillimisht ka qenë Payet ai që ka kthyer “Old Trafford” në “Teatrin e Maktheve” për tifozët vendas me një gol të jashtëzakonshëm me goditje dënimi, më pas është ngjitur në skenë Anthony Martial, që ka shpëtuar “Djajtë e Kuq” dhe Van Gaal shtatë minuta para fundit. Minuta e 68-të: Payet ka zhbllokuar ndeshjen me një goditje dënimi nga 27 metra Pas një pjesë të parë të luftuar, por pa gola, ndeshja është zhbllokuar në minutën e 68-të kur Dimitri Payet ka realizuar një nga golat më të bukur të këtij sezoni. Mesfushori francez ka ndëshkuar “Djajtë e Kuq” me një goditje dënimi perfekte nga 27 metra. Portieri De Gea nuk ka pasur mundësinë të bëjë asgjë. Lojtari i West Ham ka shkuar përsëri afër golit pak minuta më vonë, por, pasi ka dalë i vetëm përballë De Gea-s, është ndalur nga arbitri Atkinson për shkak të një faulli të shkaktuar ndaj mbrojtësit Rojo, i cili ka qenë dhe lojtari i fundit. Minuta e 83-të: Martial ka fiksuar shifrat në 1-1 Kur mendohej se edhe United do të kishte të njëjtin fat si Arsenal dhe Chelsea, të eliminuar respektivisht nga Watford dhe Everton, ka ardhur goli i Martial që ka rikthyer në lojë United. Sulmuesi francez ka barazuar në minutën e 83-të pas një krosimi të Herrera nga krahu i djathtë. Ky gol ka zgjuar vendasit, të cilët janë hedhur në sulm të golit të dytë, por rasti i fundit është krijuar nga miqtë, të cilët kanë shkuar shumë afër realizimit me Antonio-n, gjuajtja e të cilit është ndalur nga një pritje e bukur e De Gea, teksa ndeshja është mbyllur në barazim 1-1. Për të zbuluar ekipin e katërt gjysmëfinalist të Kupës së Anglisë duhet pritur ndeshja e dytë mes këtyre dy ekipeve.
Manchester United-West Ham 1-1 Shënues: Martial 83’/Payet 68’
Manchester United: De Gea, Varela (Darmian 87’), Smalling, Blind, Rojo, Carrick, Fellaini (Scweinsteiger 76’), Rashford (Depay 76’), Herrera, Lingard, Martial. Trajner: Van Gaal.
West Ham: Randolph, Antonio, Reid (Obiang 62’), Ogbonna, Cresswell, Kouyate, Noble, Emenike (Sakho 64’), Lanzini, Payet, Carroll (Valencia 82’). Trajner: Bilic. Gjyqtar: Atkinson Kartonë të verdhë: Fellaini, Carrick/Reid, Payet, Kouyate, Antonio