Anëtari i Këshillit Politik, Oerd Bylykbashi, tha sot se marrëveshja politike po implementohet në ndryshimet e Kodit Zgjedhor që do të kalojnë në Parlament.
Bylykbashi tha se sot është vendosur për detajet e identifikimit biometrik dhe për çështjen e financimit të partive.
“Diskutuam dy çështje të rëndësishme, identifikimi biometrik që është çështja kryesore e nënshkruar në Këshillin Politik si dhe financimin e partive politike.
Sot diskutojmë për të gjetur garancitë dhe ajo që do të sjellë në draftin përfundimtar është identifikimi biometrik, që do të jetë në të gjitha qendrat e votimit. Kutitë e votimit do të jenë të mbrojtura. Çështja e dytë është financimi i partive politike.
Sot ramë dakord për paketën e financimit të partive politike në fushatën zgjedhore. Ne kërkojmë që të gjejmë zgjidhje për fushatën. Në këtë kod kemi rënë dakord që të ketë reduktim të financimit privat dhe reduktim të shpenzimeve, ku 3-fshi do të jete vetëm 3-fishi i financimit publik.
Sot partitë kanë të drejtë të shpenzojnë 10-fishin e parave që marrin nga privati. Nesër Këshilli Politik mblidhet sërish për çështje që janë të hapura”, tha Bylykbashi.
Më herët, Damian Gjiknuri, deklaroi se nga opozita ishte kërkuar më shumë kohë lidhur me implementimin e disa amendamenteve, ndërsa shtoi se Këshilli Politik do të mblidhet sërisht nesër.
“Shpresojmë që drafti të përmbyllet nesër”, tha Gjiknuri.
Ndër çështjet e para për të cilat nuk kanë pasur konsensus, financimi i partive, ku palët duhet të bien dakord se sa duhet të jetë përqindja nga buxheti i shtetit për partisë, si në kohë fushate, po ashtu edhe në kohë normale, si dhe sa do të jetë raporti mes financimi privat dhe shtetëror.
Po ashtu, në dy nivelet e KQZ-së, Komisioni Rregullator dhe Ankimor, pritet që në njërin prej tyre opozita do të jetë shumicën e anëtarëve, 3 opozita dhe 2 mazhoranca.
Një çështje që ka mbetur pezull nga ekspertët është sesi do të futen në sistem PD dhe LSI, pasi duhet të shkruhen në Kod, duke qenë jashtë sistemit.
