Dy persona janë arrestuar nga policia e Sarandës pasi akuzohen për vjedhje. Pas hekurave kanë përfunduar shtetasit M. B., 42 vjeç dhe E. K., 38 vjeç, banues në fshatin Gjashtë, Sarandë.
Gjatë ditës së djeshme, këta shtetas në bashkëpunim me njëri-tjetrin, dyshohet se kanë vjedhur disa bagëti të imta të shtetasit E. M., Sarandë.
Mësohet se në momentin kur kanë parë shërbimet e policisë, ata kanë tentuar të largohen me shpejtësi me një motomjet, por janë kapur gjatë ndjekjes nga shërbimet e Policisë. Pas kontrollit të ushtruar Policia u ka gjetur edhe një mjet prerës, i cili është sekuestruar në cilësinë e armës së ftohtë.
Gjithashtu, nga hetimet e kryera, dyshohet se këta shtetas janë autorë të vjedhjeve së 3 banesave në pronësi të shtetasve O. S., N. S. dhe A. K., në fshatin Krane, disa ditë më parë, ku dyshohet se kanë marrë orendi shtëpiake me vlerë rreth 120.000 lekë.
Materialet do t’i referohen Prokurorisë, për veprime të mëtejshme.
