Një 34-vjeçar në Vlorë është arrestuar në flagrancë në tentativë për të vendosur një sasi eksplozivi pranë një banese.
Ngjarja ka ndodhur në orët e parë të mëngjesit të së dielës, 14 qershor.
Shtetasi Marlen Gutçi ka tentuar të vendosë një sasi lënde plasëse në oborrin e banesës së shtetasit A. Demiri, në lagjen “Hajro Çakërri” Vlorë, njoftoi policia.
“Falë ndërhyrjes së menjëhershme të Policisë u parandalua shpërthimi i lëndës eksplozive, pasi autori u kap në flagrancë në momentin që po vendoste lëndën eksplozive. Policia ka bërë dhe arrestimin e porositësit, konkretisht shtetasit Bexhet Alliaj, 50 vjeç, banues në Vlorë, i dënuar më parë për veprën penale “Prodhimi dhe shitja e narkotikëve”. Nga kontrolli i ushtruar në banesat e këtyre shtetasve, shërbimet e Policisë kanë gjetur dhe sekuestruar një bazë materialesh, të listuara si më poshtë: 1 armë zjarri e llojit revolver me dy fishekë, 2 sasi lënde të dyshuara eksplozive të llojit tritol, të montuara me kapsollë detonatorë me fitil zjarrpërcjellës, 21 doza të dyshuara me lëndë narkotike të llojit kokainë, 1 dozë e dyshuar lëndë narkotike e llojit heroinë, 1 peshore elektronike për peshimin e lëndës narkotike, 3 automjete (njëri rezulton i vjedhur në shtetin grek), 3 aparate celularë, targa të vjedhura, biçikletë etj”, njoftoi policia.
Vijon puna për dokumentimin e plotë ligjor të kësaj ngjarjeje, ndërsa materialet do t’i referohen Prokurorisë së Vlorës, në ngarkim të këtyre shtetasve, për veprime të mëtejshme, shtuan të njëjtat burime.
Dyshohet se tritoli ishte një mesazh paralajmërimi për të zotin e banesës.
