Seanca e sotme parlamentare ka nisur me një kërkesë të partisë Demokratike për referendum për ligjin e mbetjeve.
Deputeti demokrat Edi Paloka kërkoi që kërkesa e PD të futet në rend ditë dhe të votohet në seancë.
Paloka tha se lejimi i mbetjeve rrezikon shëndetin dhe jetën e qytetarëve shqiptarë.
Në kërkesën për referendum, Paloka tha se qytetarët duhet të pyeten “a duhet të lejohet importi i mbetjeve?”
“Kërkojmë nga Kuvendi miratimin e kërkesës për referendum. Pyetja që shtrohet për referendum është ‘A duhet të lejohet importi i mbetjeve në territorin e Shqipërisë’”, tha Paloka.
“Importi i mbetjeve nuk përputhet as me objektivin social kushtetues që shteti synon ndër të tjera, një mjedis të shëndetshëm për brezat e sotëm dhe të ardhshëm. Qëndrimi ynë përveç paraqitjes së referendumit paraqesim edhe qëndrimin e PD lidhur me këtë çështje. Ne jemi kundër, i themi “Jo” lejimit të importit të mbetjeve: rrezikon jetën e qytetarëve, krijon premisa të kontrollit nga grupe kriminale ndërkombëtare”, tha deputeti Paloka.
