Forumi Ekonomik Botëror ka publikuar raportin për vitin 2016-2017 në lidhje me konkurrueshmërinë, ku e rendit Shqipërinë në vendin e 80-të. Në këtë mënyrë, vendi ynë është përmirësuar me 13 vende nga raporti i mëparshëm, ku vendi ynë renditej 93-ti.
Ministria e Zhvillimit Ekonomik duke iu referuar këtij raporti thotë se Shqipëria është përmirësuar me 17 pozicione në renditjen globale, sa i përket konkurrueshmërisë.
“Nga analiza e bërë sipas shtyllave kryesore, vërehet se ka patur një rritje pothuajse në të gjithë indikatorët sidomos në atë “Arsimi dhe Shëndeti” (që renditet në vendin e 33-të duke u rritur me 19 pozicione nga një vit më parë). Rritje u shënuan edhe në indikatorët e tjerë si Mjedisi Makroekonomik, Arsimi i Lartë dhe Trajnimet, Zhvillimi i Tregjeve Financiare, Gatishmëria për Teknologjinë, Inovacioni dhe Sofistikimi i Biznesit, kanë ndikuar në mënyrë të konsiderueshme në rritjen e pozicionit të Shqipërisë përsa i përket konkurrueshmërisë. Në këtë raport Shqipëria mban pozita të favorshme, duke lënë pas Greqinë, Malin e Zi, Serbinë dhe Bosnje-Hercegovinën, në renditjen globale, sa i përket konkurrueshmërisë. Raporti evidenton se Shqipëria grumbullon 4.06 pikë nga 3.93 pikë që grumbullonte një vit më parë.”
