Maqedonia e Veriut po përballet me një valë të re infektimesh me COVID-19, që ka detyruar autoritetet të rikthejnë izolimin në disa qytete të vendit. Dita e sotme shënon rekordin e numrit të të prekurve me coronavirus në RMV.
120 raste pozitive e bëjnë shqetësuese situatën duke dëshmuar një valë të re infektimesh, sidomos në qytete me shumicë shqiptarë si Tetova, Kumanova dhe rrethinat e Shkupit.
2611 është totali i personave të infektuar në vend.
Në një lidhje të drejtpërdrejtë me Euronews Albania mjeku nga Maqedonia e Veriut, Aliriza Osmani tha se situata ka ardhur duke u përkeqësuar me rritje të numrit të të prekurve me COVID-19, kjo sipas për shkak të hapjes së menjëhershme të vendit pas masave shtrënguese të karantinimit.
Sipas mjekut, në rikthimin e numrit të madh të infektimeve kanë ndikuar shumë edhe festat fetare siç ishte festa e Bajramit, por edhe politika për të ka rolin e vet në menaxhimin jo të mirë të situatës.
“Numri po vjen vetëm duke u rritur, kjo si rezultat i lirimit të menjëhershëm të masave të marra më herët. Sigurisht dita e Bajramit bëri të vetën, paraprakisht kishim një festë tjetër fetare që ndikoi gjithashtu. Këtu janë përzierë edhe politika, edhe feja duke sjellë këtë numër të lartë rastesh”, tha mjeku.
Teksa theksoi faktin se problemet të rënda shfaqen tek moshat e thyera, mjeku theksoi faktin se përkundër fjalëve se fuqia e virusit është zbehur ditët e fundit në RMV COVID-19 është shfaqur mjaft agresiv, me raste fatale dhe përkeqësim të gjendjes së pacientëve të shtruar në infektiv.
