Disa persona kanë tentuar të grabisin një furgon që grumbullonte qumështin e më pas kanë qëlluar për vdekje 26 vjeçarin në Torovicë të Lezhës.
Sipas burimeve policore autorët kanë tentuar të grabisin drejtuesin e mjetit duke i dalë para furgonit, por më pas kanë qëlluar duke e lënë të vdekur pasagjerin. Furgoni përdorej për grumbullimin e qumështit në Malin e Jushit. Drejtuesi i mjetit ishte shoferi me iniciale A.Q.
Mjeti ndaj të cilit u qëllua me armë ishte kamionçinë me targa AA5532BY. Ngjarja ndodhi në vendin e quajtuar “Shkami i Kuq” në Torovicë. Policia ka ngritur pika kontrolli për kapjen e autorëve.
Njoftimi i policisë:
Me datë 27.09.2016, rreth ores 06:15 , është marrë njoftim se në rrugen e vjetër për Torovicë, në kufirin ndares me Shkodren, ka ndodhur një vrasje.
Menjëherë në vendngjarje kanë mbërritur shërbimet policore që kanë konstatuar se persona akoma të paidentifikuar kanë qëlluar me armë zjarri në drejtim të një mjeti Ford i cili po udhëtonte në drejtim të fshatit Torovicë.
Në automjet lëviznin shtetasit A.Q. (drejtues mjeti ) dhe Ajet Qokthi, 26 vjeç ( pasagjer) , të dy banues në Shkoder.
Si pasoje e të shtënave ka humbur jetën Ajet Qokthi.
Janë ngritur pika kontrolli e po bëhet krehja e zones me qëllim kapjen e autorëve.
Grupi hetimor në vendngjarje po punon për zbardhjen e plotë të ngjarjes.
