Pas 7 muajsh hetime, policia e Kavajës ka ekzekutuar sot operacionin e koduar “Zhuri”, duke vënë në pranga dy pronarë hotelesh, 5 shtetase që ushtronin prostitucionin, si dhe një person që është kapur në hotel duke kryer marrëdhenie seksuale kundrejt pagesës.
Burime zyrtare njoftojnë se pas hekurave ka përfunduar shtetasi B. Gj., 61 vjeç, banues në Rrogozhinë. Këtij shtetasi i është caktuar masa e sigurisë “Arrest në burg”, për veprat penale “Shfrytëzimi i prostitucionit” dhe “Mbajtja e lokaleve për prostitucion”. 61-vjeçari është pronar i një hoteli në zonën e quajtur”Bishti i Zhurit”, në Rrogozhinë;
Pas hekurave ka përfunduar dhe shtetasi F. H., 58 vjeç, banues në Rrogozhinë. Edhe këtij shtetasi Prokuroria e Kavajës i ka caktuar masën e sigurisë “Arrest në burg”, për veprat penale “Shfrytëzimi i prostitucionit” dhe “Mbajtja e lokaleve për prostitucion”. 58-vjeçari është pronar i një hoteli në zonën e quajtur “Bishti i Zhurit”, në Rrogozhinë;
Në pranga janë vënë dhe shtetaset M. M., D. M., G. D., Q. R. dhe V. M., me masë sigurie “Arrest në burg”, për veprën penale “Prostitucioni”.
Gjithashtu është arrestua dhe shtetasi R. L., banues në Divjakë, pasi është kapur në flagrancë në ambientet e hotelit në pronësi të shtetasit B. Gj., duke kryer marrëdhenie seksuale kundrejt pagesës, me shtetasen Q. R.
Në cilësinë e provave materiale janë sekuestruar 370.000 lekë të reja, të përfituara nga shfrytëzimi i këtyre shtetaseve për prostitucion, 7 telefona celular dhe një autoveturë.
Materialet në ngarkim të këtyre shtetasve i kaluan Prokurorisë pranë Gjykatës së Shkallës së Parë Kavajë, për veprat penale “Shfrytëzimi i prostitucionit”, “Mbajtja e lokaleve për prostitucion“ dhe “Prostitucioni“.
