Milani nuk ka arritur të shkojë më larg se një barazim pa gola në fushën e Chievo-s dhe tani mund t’i thotë lamtumirë ëndrrës për të siguruar një vend në Champions League, duke parë se rivalët kanë krijuar një avantazh të madh kundrejt kuqezinjve. Edhe vendi i pestë në renditje, që siguron një vend në fazën para-eliminatore të Europa League, nuk do të jetë i lehtë për t’u arritur pasi Fiorentina e Sousa ka një avantazh prej pesë pikësh. E vetmja mundësi për t’u kualifikuar në kompeticionin europian sezonin e ardhshëm mbetet fitorja e Kupës së Italisë sepse këtë vit nuk vlen më rregulli që mjafton arritja e finales për t’u kualifikuar në Europa League. Chievo Verona – Milan Live Score Paraqitja e kuqezinjve ka qenë shumë zhgënjyese, me lojtarët e Mihajlovic që kanë goditur vetëm dy herë kuadratin e portës në pjesën e parë. Vendasit janë mbrojtur mirë dhe kanë kërkuar të godasin në kundërsulm, por pa pasur sukses. Dy momentet më të rrezikshme për miqtë kanë ardhur në minutën e 75-të të ndeshjes kur Abate dhe Bertolacci kanë goditur respektivisht traversën dhe shtyllën gjatë të njëjtit aksion. Në minutën e 90-të kanë qenë veronezët që kanë gjetur rrugën e golit, por arbitri e ka anulluar, me të drejtë, për një pozicion jashtë loje. Në fund takimi ëstë mbyllur 0-0, një rezultat që nuk duhet të kënaqë aspak presidentin Berlusconi, i cili nuk i ka fshehurr rezervat e tij për trajnerin Mihajlovic në të kaluarën.
Sfida e “Bentegodi”-t nuk ka filluar mirë për kuqezinjtë pasi në minutën e 18-të portieri Donnarumma ka qenë i detyruar të largohet nga fusha për shkak të një përplasjeje me Cacciatore. Lojtari, pasi ka marrë ndihmën e parë në fushë, është dërguar menjëherë në spital për një kontroll më të detajuar, duke parë se ka marrë një goditje në kokë. Në vendin e tij është aktivizuar veterani Christian Abbiati, i cili është kthyer të luajë një ndeshje në Serinë A pas 10 muajsh. Ndeshja e tij e fundit në kampionatin italian ka qenë më 21 maj 2015-të, Atalanta-Milan 1-3.
Chievo-Milan 0-0 Chievo: Bizzarri, Cacciatore, Dainelli, Cesar, Gobbi, Castro, Radovanovic, Hetemaj, Birsa (Pepe 73’), Floro Flores (Pellissier 62’), Meggiorini (m’Poku 88’). Trajner: Maran. Milan: Donnarumma (Abbiati 19’), Abate, Alex, Romagnoli, Antonelli, Honda, Poli (Jose Mauri 85’), Bertolacci, Bonaventura, Bacca, Menez (Adriano 61’). Trajner: Mihajlovic. Gjyqtar: Damato Kartonë të verdhë: Dainelli, Cacciatore, Gobbi/Menez, Bonaventura, Abate
