oalicioni për Reforma Integrim dhe Institucione të Konsoliduara (KRIIK) është shprehur me zhgënjim se bisedimet për reformën zgjedhore janë larg pritshmërive për një reformë të vërtetë të thelluar dhe gjithëpërfshirëse.
Eksperti ligjor i KRIIK, Reald Keta, analizoi për Euronews Albania ecurinë e reformës dhe qendrimin Koalicionit për Reforma.
Keta tha se palët nuk po arrijnë as minimalen e një demokracie institucionale që është arritja e një dakordësie në dialog.
“Fatkeqësisht kjo klasë politike e ka vendosur demokracinë shqiptare në këto kushte që mjaftohet të jemi në një gjuhë dialoguese dhe institucionale,” – u shpreh eksperti ligjor.
Thelbi i problematikës sipas KRIIK, është te konstituimi i trupës së Komisionit Qendror të Zgjedhjeve (KQZ), që është institucioni mbikëqyrës, organizues dhe kontrollues të procesit.
“Sipas kuadrit zgjedhor, trupa e KQZ-së është një trupë me kundrabalacim politik parlamentar me një votë cilësore që duhet të vinte nga shoqëria civile, ekspertiza e lartë, pra është e provuar që kjo trupë është apolitike deri në momentin kur klasa politike e anatemon si politike,” – u shpreh Keta teksa këmbënguli se reforma e pritshme duhet të fillonte nga konstituimi i KQZ-së se çfarë do të bënte KQZ-ja e re.
Keta ngriti pyetjen se si mundet që KQZ-ja e politizuar të mund të kontrollojë financat e partive.
Për sa i përket depolitizimit, Keta tha se ky proces duhet të niste nga komisionet e qendrave të votimit.
“Kjo qasje, sigurisht është e vështirë, por do të ishte më realiste dhe më e mundshme,” – tha eksperti i KRIIK, i cili e konsideroi “paranë dhe financimin e partive” si problemin kryesor të skemave manipulative në zgjedhje.
“Duhet ditur se kush i sponsorizon ofertat elektorale që do të jenë nesër,” – këmbënguli Keta.
E diela, e cila mbylli muajin maj, kaloi pa dakordësi për sa i përket reformës zgjedhore mes mazhorancës dhe opozitës, ku çështjet kryesore që ndajnë palët mbeten qeveria tranzitore, identifikimi elektronik i votuesve dhe administrimi i zgjedhjeve.
