Pas vdekjes së një polici mbrëmë nga një aksident rrugor, ministri i Brendshëm Saimir Tahiri deklaroi se do të ketë një ashpërsimi të Kodit Penal.
Tahiri tha se do të propozojë që çdo aksident me pasojë vdekjen e qytetarëve do të jetë i dënueshëm sipas kodit duke u klasifikuar si “vrasje rrugore”.
“Unë shumë shpejt do të propozoj një amendim në Kodin Penal, në mënyrë që aksidentet me pasoja në shëndetin apo jetën e njerëzve të mos quhen më “aksidente me pasojë vdekjen”, por “vrasje”. Ka disa vende në Europë që e kanë bërë këtë, duke mos i klasifikuar aksidentet si të tilla me pasoja në shëndetin apo jetën e qytetarëve, por si plagosje apo vrasje”, tha Tahiri pas homazheve për policin e rënë në detyrë, në një aksident në Kamëz.
