Kreu i PD-së Lulzim Basha takoi të shtunën qytetarët në zonën e Kënetës në Durrës, të cilët përveç se nga tërmeti, janë goditur rëndë ekonomikisht dhe nga pandemia e Covid-19.
Basha akuzoi kryeministrin Rama se ka lënë pas dorë qytetarët e thjeshtë gjatë pandemisë, duke sjellë falimentimin e bizneseve të tyre dhe rrënimin e tyre ekonomik.
“Në zonën e Kënetës në Durrës takova qindra qytetarë të rrënuar nga pandemia ekonomike e qeverisë. Si kudo në Shqipëri, edhe këtu Ramavirusi ka shkatërruar ekonominë dhe vendet e punës, duke shtuar hallet për këta banorë të goditur rëndë edhe nga tërmeti i 26 nëntorit”, shkruan Basha në Facebook.
Basha theksoi se Rama i ka çuar leket e buxhetit të shtetit, jo tek qytetarët, por tek oligarkët:
“Në vend që të ndihmonte qytetarët paratë vazhdoi ti çonte te oligarkët. Vetëm pardje thesari i shtetit pagoi 700 mijë euro të parave tuaja, të taksave tuaja për inceneratorin e Tiranës.
Për t’i hapur rrugë ndërtimit të kullave, shembi Teatrin dhe do të marrë 30 milionë euro borxh. Sepse interesi i Edi Ramës nuk janë qytetarët që sot janë në pamundësi.”
Kreu i PD-së i premtoi qytetarëve se ardhja e opozitës në pushtet do të ndryshojë gjendjen e tyre sepse “Partia Demokratike ka vullnetin, vizionin, përvojën dhe dëshirën për t’i shërbyer qytetarëve.”
Ai i bëri thirrje njerëzve të bashkohen për të larguar Ramën nga pushteti si e vetmja mundësi për t’i kthyer qytetarëve dinjitetin dhe jetën normale:
“Vërtet nuk ka ende vaksinë për koronavirusin, por ka vaksinë për Ramavirus dhe ky është bashkimi ynë për të sjellë ndryshimin që pret çdo shqiptar: një qeveri normale për t’i garantuar qytetarëve një jetë normale dhe me dinjitet.”
