Operacioni Ndërkombëtar i Monitorimit reagon për çështjen e pezullimit nga detyra të gjyqtarit të Kolegjit të Posaçëm të Apelimit, Luan Daci, i cili akuzohet se ka fshehur faktin se në vitin 1997 është shkarkuar nga detyra e gjyqtarit me vendim të KLD.
ONM kundërshton revokimin e vendimeve të marra nga KPA me një anëtar të dyshuar si mashtrues pasi sipas saj ato kanë qenë kolegjiale.
“Ne konstatojmë se puna e Dhomës së Apelit ka qenë tërësore në thelb. Vendimet e marra nga Dhoma e Apelit janë miratuar në bazë të një mekanizmi kolegjial të vendimmarrjes, nga një kolegj apeli i përbërë nga pesë anëtarë dhe për këtë arsye jo i varur nga një individ i vetëm”, shkruhet në reagimin e ONM për A2.
Më tej, Operacioni Ndërkombëtar të Monitorimit sqaron dhe motivet se pse kishte shpëtuar nga “sita” e vlerësimit të kandidaturave për në KPA të shkeljes së gjyqtarit Luan Daci.
“Për çështjen specifike që lidhet me mosveprimin e pretenduar të z. Dacit për t’iu nënshtruar një veprimi disiplinor gjatë kohës që shërbente si gjyqtar, ONM-ja vëren se në dokumentacionin dhe jetëshkrimin e dorëzuar nga aplikanti në vitin 2017, dhe që u është vënë në dispozicion vëzhguesve në atë kohë, kishte vetëm referencë për përvojën e tij profesionale si avokat dhe nuk kishte të dhëna për mandatin e tij të mëparshëm si gjyqtar”.
