Kryetarja e Lidhjes Demokratike të Gruas së Shqipërisë, Albana Vokshi ka bërë një takim me Forumin e gruas në Kosovë ku ka deklaruar se pjesëmarrja e grave në qeveri është një fasadë duke e krahasuar me numrin e ulët që kanë ato në administratën shtetërore dhe private. “Fasada me numrat e grave në qeveri e Parlament nuk reflektohet aspak në një përmirësim të numrit dhe statusit të tyre në administratën publike dhe atë private”.
Për më tepër ajo nuk nguroi të sillte në këtë takim dhe shifra që tregojnë papunësinë e grave dhe vajzave në Shqipëri sipas raportit të INSTAT. “Është rritur numri i papunësisë së grave dhe vajzave mbi 50 deri 70%.”, ka thënë ajo.
Në këtë takim Vokshi inkurajoi partitë Kosovare që të rrisnin numrin e kuotës së gruas në qeverisje. “Kuota 50% e lançuar nga PD tashmë është realitet në Shqipëri. Sfida të tjera na presin së afërmi për rritjen e kuotës së grave parlamentare në Shqipëri e Kosovë”, tha Vokshi.
Ajo iu bëri thirrje grave në Shqipëri dhe Kosovë të ngrihen për të drejtat e tyre ekonomike që fëmijët e tyre të mos brakstisin vendlindjet nga varfëria dhe pasiguria. E ardhmja e fëmijëve tanë –tha deputeja Albana Vokshi- duhet të ndërtohet në Shqipëri dhe në Kosovë.
Kryetarja e Forumit të Gruas së Lidhjes Demokratike të Kosovës, Lirije Kajtazi përgëzoi kolegen Albana Vokshi për lobimin e saj jo vetëm në Partinë Demokratike , por edhe në forumet politike europiane dhe në agjencitë ndërkombëtare për të fuqizuar statusin e gruas në Shqipëri dhe deklaroi se edhe LDK është gati të ndryshojë statusin për më shumë gra në vendimmarrje.
Gjatë takimit në Prizren, përfaqësueset e forumeve të grave nga Shqipëria dhe Kosova u angazhuan për nisma rajonale të përbashkëta për të mbështetur projekte për fuqizimin e satusit të grave dhe vajzave.
