Arta Dade, një prej figurave kryesore të së majtës në Shqipëri, është shprehur për herë të parë kundër kryebashkiakut të Tiranës, Erion Veliaj. Shkak për këtë qëndrim është vendimi i bashkisë së Tiranës për të shembur godinën e Teatrit Kombëtar.
Dade e ka mbështetur më parë Veliajn pavarësisht kritikave drejtuar udhëheqjes së PS-së dhe veçanërisht kryeministrit Edi Rama, por sot në “A Show” në Syri Tv, ish-ministrja e Jashtme mbajti qëndrim tjetër. Ajo theksoi se Erion Veliaj nuk mund të jetë alternativë për të marrë drejtimin e Partisë Socialiste.
“Nuk besoja se kjo do të ndodhte (shembja e godinës) duke patur një lloj besimi te kryetari i bashkisë sepse doja ta shihja si alternativë në PS. Përfundimisht me këtë që bëri nuk është alternativë por mbështetës i Edi Ramës. Besoja se Erioni nuk do i merrte përsipër të gjitha kusuret e Edi Ramës. Nuk ka se si një Teatër Kombëtar t’i përkasë bashkisë së një qyteti”, tha Dade.
“Është bërë një akt i paprecedent”, shtoi ish-deputetja e PS për shembjen e godinës së teatrit.
